Amdanom Ni

Rydym yn elusen dan arweiniad myfyrwyr. Rydym ar wahân i'r brifysgol. Mae eich aelodaeth yn awtomatig ac am ddim, a chi yw un o aelodau diweddaraf cymuned sy’n cynnwys miloedd o fyfyrwyr. 

Rydyn ni'n dîm o bobl gyfeillgar - fel arfer wedi'u gwisgo mewn porffor ac yng nghwmni Dafydd y Ddraig - a’n hamcan yw eich helpu i wneud y gorau o'ch amser fel myfyriwr. Mae gennym wahanol dimau yn yr Undeb - Cyfleoedd, Llais, Cynghori, Lleoliadau (a Dylunio a Chyfathrebu, sy'n ysgrifennu hwn) - a byddwn yn darparu amlinelliad o'r hyn y mae pob un yn ei wneud a pham y byddech chi am eu hadnabod.

Llywyddion

Efallai nad ydych yn gwybod hyn, ond nid ydym yn rhan o’r brifysgol – rydym yn sefydliad ar wahân sy’n gweithio gyda nhw er lles holl fyfyrwyr PCyDDS. Rydym yn elusen sy’n cael ei harwain gan fyfyrwyr a dan arweiniad tîm o Lywyddion sy’n fyfyrwyr etholedig – eich llywyddion eleni yw Maria, Rhobyn, a Natalie.

Cyfleoedd

Nod ein tîm Cyfleoedd yw darparu hwyl. Mae eich amser fel myfyriwr yn fwy na darlithoedd yn unig, ac fel aelod, gallwch gymryd rhan mewn llawer o wahanol weithgareddau, gan gynnwys ymuno â chlybiau a chymdeithasau neu ddechrau clybiau a chymdeithasau sy’n ymwneud â diddordeb neu angerdd cyffredin. Gallwch hefyd fynychu ein digwyddiadau (gan gynnwys y cyfnod Croeso swyddogol), cael profiadau gwych gyda Rhowch Gynnig Arni a datblygu eich sgiliau a'ch gwybodaeth gyda'r Wythnos Sgiliau.

Llais

Mae ein tîm Llais yn frwd dros sicrhau bod syniadau a barn myfyrwyr yn cael eu trosglwyddo i'r bobl sydd angen eu clywed. Nhw sy’n gofalu am ein cynrychiolwyr myfyrwyr (ydych chi am ddod yn un ar gyfer 2024/25?), yn cadw llygad ar ein llwyfan Syniadau Mawr, ac yn gyfrifol am bopeth sy’n ymwneud ag etholiadau myfyrwyr.

Cynghori

Rydyn ni i gyd angen help weithiau - fel aelod, gallwch chi ddefnyddio ein gwasanaeth cynghori. Mae’n annibynnol, yn gyfrinachol ac am ddim. Rydym am eich grymuso i wneud y penderfyniadau sy'n iawn i chi.

Lleoliadau

Gallwch ddod i'n bariau, clybiau, a lleoliadau. Mae gennym ni’r Llofft a’r Clwb yng Nghaerfyrddin a’r Hen Far ac Xtension yn Llambed. Mae ein hardaloedd a lleoliadau myfyrwyr yn fannau gwych i ymlacio, dal i fyny gyda ffrindiau, chwarae gemau, gwylio’r teledu, a mwynhau nosweithiau allan.

Dylunio a Chyfathrebu

Ac yn olaf, ond nid yn lleiaf yw’r adran Dylunio a Chyfathrebu - sy’n gweithio gyda'r holl dimau eraill i ledaenu'r gair i gynifer o bobl â phosibl. Fel arfer ni sy'n ysgrifennu cynnwys y cyfryngau cymdeithasol a'r e-byst - mae croeso i chi ddod draw a dweud Helo.
 

Dod yn aelod

Unwaith y byddwch wedi ymrestru fel myfyriwr yn PCyDDS, rydych yn dod yn un o’n haelodau’n awtomatig – nid oes ffurflen i’w llenwi na ffi i’w thalu – does ond angen i chi gwblhau cofrestriad ar y wefan i gael y gorau o’ch aelodaeth ac ymuno â digwyddiadau a grwpiau heb unrhyw oedi.

Mae aelodaeth am ddim

Mae aelodaeth o Undeb y Myfyrwyr am ddim, ond mae’n bosib y codir tâl am yr hyn a wnawn. Mae ein clybiau a chymdeithasau’n cael eu rhedeg gan fyfyrwyr ac efallai y byddant yn codi eu ffi ymuno eu hunain; efallai y byddwn hefyd yn codi ffi ar gyfer rhai o'n digwyddiadau.

Math o Aelodaeth

Aelodau sy’n Fyfyrwyr - dyma fwyafrif ein haelodau. Maent yn fyfyrwyr cyfredol yn PCyDDS a gallant gael mynediad i’n holl wasanaethau, yn ogystal ag enwebu a phleidleisio yn ein hetholiadau.

Aelodau Cyswllt - mae’r rhain yn gymysgedd o fyfyrwyr nad ydynt yn astudio yn PCyDDS a’r rhai nad ydynt yn fyfyrwyr sydd wedi ymuno ag un o’n clybiau neu gymdeithasau. Gallant fynychu gweithgareddau clybiau a chymdeithasau, ond ni allant ddefnyddio ein gwasanaethau eraill ac ni allant enwebu na phleidleisio yn ein hetholiadau.

Optio allan o Aelodaeth

Os ydych yn dymuno optio allan o’ch aelodaeth o’r Undeb, gallwch wneud hyn trwy e-bostio union@uwtsd.ac.uk. Fodd bynnag, byddwch yn colli mynediad i'n holl wasanaethau a gweithgareddau. Gallwch bob amser optio i mewn unwaith eto, cyn belled â'ch bod yn fyfyriwr cofrestredig trwy e-bostio undeb@uwtsd.ac.uk.