Dydd Llun 03-07-2023 - 15:00

Gan ei bod yn ddiwedd y flwyddyn academaidd, mae angen i ni hefyd ddweud hwyl fawr wrth Bronwyn K, Llywydd Campws Llambed.

Mae hi wedi llwyddo cyfrannu rhai pethau anhygoel ac mae wedi helpu i wella profiad myfyrwyr dros y flwyddyn ddiwethaf – pethau fydd yn parhau i effeithio ar fywydau myfyrwyr am flynyddoedd i ddod.

Fe aethon ni ati i holi Bronwyn am ei phrofiadau fel Swyddog Sabothol, felly drosodd at Bronwyn:

Beth oedd dy hoff beth am fod yn Llywydd Campws Llambed?

Fy hoff beth am y rôl hon yw bod yn hyrwyddwr mwyaf Llambed. Rwyf wrth fy modd yn gweithio gyda'r myfyrwyr a gwneud newidiadau er gwell. Rwyf hefyd wedi bod wrth fy modd yn trefnu digwyddiadau fel y ddawns haf a’r ffair yrfaoedd. 

Beth wyt ti wedi'i gyflawni yn ystod dy gyfnod fel Llywydd Campws Llambed?

Yn gyntaf, fe ddechreuon ni'r flwyddyn gyda’r cyfnod Croeso, gan wneud yn siŵr bod ein holl fyfyrwyr yn ymgartrefu ac yn setlo i mewn ar y campws. Cynhaliais ychydig o ddigwyddiadau i greu mannau agored i fyfyrwyr gwrdd, dechrau siarad a gwneud ffrindiau newydd; trefnwyd râs lliwiau, sesiwn gelf, amseroedd yn ystod y dydd i gwrdd â’r Swyddogion Sabothol a thîm yr Undeb a mwynhau te prynhawn.

Mis Hanes Pobl Dduon
Gweithiais gyda Vanessa (Llywydd y Grŵp) a Rhobyn (ein swyddog Myfyrwyr Croenddu rhan-amser yn Llambed) ar gyfer Mis Hanes Pobl Dduon. Yn ystod y mis hwn cynhaliwyd noson ffilm, noson meic agored a phanel lle’r oedd gennym ni fyfyrwyr, staff, a siaradwr allanol. Ac fe drefnon ni banel gyda Rhobyn Grant, Emily-Rose Kumi a Javorne Campbell. Roedd yn gyfle i’n panelwyr ddathlu treftadaeth Groenddu a siarad am brofiadau bywyd, materion cyfoes, llesiant, a dadwladychu. 

Swyddi Myfyrwyr
Ysgrifennais siarter swyddi myfyrwyr. Er mwyn i Undeb y Myfyrwyr fod â thudalen swyddi myfyrwyr. Ar ôl gosod y dudalen, bûm yn gweithio gyda'r brifysgol i sefydlu 34 o interniaethau; y ffocws oedd sicrhau y byddai'r interniaethau hyn yn gweithio i unrhyw fyfyriwr ar unrhyw gampws, a hefyd sicrhau bod y trefniant yn gweithio o amgylch eu hastudiaethau. Mae hyn yn rhywbeth yr wyf yn gobeithio y bydd yr UM yn penderfynu parhau i’w wneud.  

Cynhaliais ffair ddyniaethau gyntaf ar Gampws Llambed gyda chymorth tîm gyrfaoedd y brifysgol. Roedd y digwyddiad hwn yn cynnwys dros 25 o gyflogwyr a 4 gweithdy. Roedd y gweithdai hyn yn ymwneud â sut i fod yn hunangyflogedig, sut i ysgrifennu CV a datganiad personol, un ar ddatblygiad rhyngwladol a'r olaf ar wirfoddoli yn yr ardal leol. Rhoddodd y ffair yrfaoedd hon gyfle i fyfyrwyr siarad a gofyn cwestiynau am gyflogaeth a’u helpu i gael mewnwelediad gwerthfawr i’w gyrfaoedd yn y dyfodol.

Llesiant
Trefnais sesiynau ymgynghori gyda’r tîm llesiant. Roedd y cyfarfodydd hyn yn caniatáu i fyfyrwyr a’r tîm llesiant drafod y wefan a’r ffurflenni a sut mae’r systemau’n gweithio, fel y gellir ei gwella a’i gwneud yn haws i’w defnyddio.

Cynaladwyedd
Mewn partneriaeth â'r Brifysgol, trefnodd Undeb y Myfyrwyr wythnos i fyfyrwyr ddysgu am sut y gallant fod yn fwy ecogyfeillgar yn eu bywydau o ddydd i ddydd.

Yn ystod yr Wythnos Werdd bu myfyrwyr a phobl leol yn cymryd rhan mewn amryw o weithdai. Dysgon ni am bwysigrwydd gwlân ac am yr angen i ddefnyddio gwlân i wneud dillad a’r budd mae hyn yn ei greu i’r amgylchedd. Dysgon ni am ddefnyddio cynhyrchion naturiol yn lle nwyddau artiffisial i gadw bwyd yn y drafodaeth am gwyr gwenyn ar gyfer lapio bwydydd. A chynhaliwyd llawer mwy o weithdai er mwyn darparu gwybodaeth ddefnyddiol i bawb, ynghyd ag awgrymiadau a hintiau handi ar sut i fyw bywyd gwyrddach. Yn ystod yr wythnos bu myfyrwyr yn bywiogi campws a chymuned Llambed wrth helpu i wella a datblygu'r amgylchedd lleol.

Dawns Haf Llambed
Yn olaf ond yn bendant nid yn lleiaf, fe wnes i drefnu a chynnal dawns haf diwedd y flwyddyn yn Llambed. Gyda chymorth tîm Undeb y Myfyrwyr, llwyddwyd i gynnal noson i’w chofio yn Llambed. Roedd yn noson fythgofiadwy ac yn ffordd berffaith i ddathlu diwedd y flwyddyn.

Beth yw dy gynlluniau ar ôl y rôl hon?

Ar ôl i mi adael y rôl hon, rydw i'n symud ymlaen i barhau â'm haddysg drwy ddechrau ar fy ngradd meistr. 

Pa gyngor/geiriau o ddoethineb hoffet ti eu trosglwyddo i'n Swyddogion Sabothol newydd?

Ar gyfer y Swyddog Sabothol nesaf ar gampws Llambed y geiriau o ddoethineb sydd gen i i’w cynnig i chi yw: gwrandewch ar eich myfyrwyr, ymddiriedwch yn eich greddf, a brwydrwch bob amser dros Lambed. 

Mae bod yn adnabyddus a bod eich myfyrwyr yn ymddiried ynddoch chi’n golygu bod gennych ymgysylltiad anhygoel. 

Unrhyw beth arall sydd gen ti i’w ddweud cyn i ti fynd?

Yn olaf, hoffwn ddweud diolch enfawr i'r myfyrwyr, rydych wedi bod yn anhygoel; rydym wedi profi’r gorau a’r gwaethaf, ond rydym wedi goroesi gyda'n gilydd. 

Hoffwn hefyd ddiolch i staff Undeb y Myfyrwyr ac i staff y Brifysgol. Heb y bobl hyn ni fyddwn wedi gallu cyflawni fy mhwyntiau maniffesto yr ydych chi fel myfyrwyr wedi fy ethol i wneud.
 

• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
•